Furuno FCV-30

FCV-30 er fjölgeisla dýptarmælir með 5 sjálfstæðum geislum.  Skipstjórnandinn getur beint hverjum þeirra í hvaða átt sem er, mest í 20 gráður.  Mælirinn staðsetur fiskilóðningar í hverjum geisla í afstöðu frá skipinu og greinir hvernig þær dreifast.

Hreyfing skips á bárunni, dýfur og veltur (pitching and rolling) og mismunandi ölduhæð (heaving) valda ekki aðeins skekkjum á dýptarmælismyndinni, heldur einnig á stærðargreiningu fiska. Furuno hefur þróað ölduleiðréttingartækni (Furuno´s exclusive Stabilizer Technology) sem leiðréttir bæði sendi- og móttökugeislana fyrir skekkjum sem mismunandi ölduhæð, dýfur og veltur valda, jafnvel í verstu veðrum. Útkoman er rétt og hárnákvæm mynd á dýptarmælinum.

FCV-30 dýptarmælirinn er með fjölgeislatækni Furuno (Multi-Beam) og ölduleiðréttingu.  Hér er sannarlega um hátækni mæli að ræða sem nýtist afar vel við flestar aðstæður og veiðiskap.  Þá er í honum “Split-Beam” tækni sem nýtist við fiskirannsóknir og vísindaveiðar.  Forskot Furuno í tæknilegri úrvinnslu endurvarpa setur FCV-30 mælinn í fremstu röð fiskileitartækja af stærri gerðinni.

Í mælinum má velja milli margra framsetninga á skjámyndinni í háskerpu:  “Multi-Beam”, “Split-Beam”, “Zoom” og “A-Scope”.  Í Multi-Beam framsetningunni er hægt að senda samtímis í allt að fimm áttir og fá fram staðsetningu og dreifingu fiskitorfa allt í kringum skipið.  Hverjum geislanna er beint sjálfstætt í hvaða átt sem er.  Þessi tækni gagnast einnig við að greina samsetningu botnsins, ójöfnur og brekkur sem gagnast skipstjórnandanum við að ákveða hvaða hraði og stefna koma sér best á hverri togslóð.

Þegar mælirinn er í Split-Beam framsetningu verður virk einstök stærðar- og dreifigreiningartækni Furuno, “Fish size assessment and Fish distribution”.  Stærðargreininginn segir til um lengd einstakra fiska í torfu og eru þær upplýsingar settar fram í formi súlurits.  Dreifigreininginn segir til um hvar í geislanum einstakir fiskar (target fish) eru og birtir þá staðsetningu á skjánum.

FCV-30 mælirinn er “BlackBox” dýptarmælir (BB), samanstendur af stjórneiningu, vinnslueiningu, sendi- og móttöku einingu og botnstykki.

Stjórneiningin samanstendur aðeins af kúlumús, skrunhjóli og nokkrum hnöppum.  Mælirinn er hannaður fyrir atvinnuveiðar og mjög hentugt er að nota við hann Furuno skjái.  Eins má nota við hann venjulega tölvuskjái.  Hægt er að nota tvo skjái samtímis við mælinn með sitt hvorri myndinni.
Í botnstykki FCV-30 mælisins eru afar næm augu (elements) sem þurfa litla orku þó svo að langdrægi mælisins sé mikið.  Botnstykkið vinnur á 38 kHz og geislabreiddin er þröng, 7 gráður, sem gerir kleift að greina lögun fiska og fiskitorfa og dreifingu þeirra af mikilli nákvæmni.

Innbyggður hreyfiskynjari í mælinum ásamt ölduleiðréttingunni halda sendigeislanum stöðugum og þannig er komið í veg fyrir að mælirinn missi út fisklóðningar, t.d. í mikilli brælu.  Geislarnir eru stöðugir þrátt fyrir dýfur og veltur (pitch and roll) og þegar mælirinn er tengdur Furuno GPS áttavita greinir hann  ölduhæðarbreytingar (heaving) ásamt dýfum og veltum, leiðréttir botnlögunina og fiskendurvörp.  Allt eykur þetta gæði skjámyndanna þrátt fyrir brælur og stærðargreiningin verður mjög nákvæm.







Vörulýsing

Tíðni: 38 kHz Sendiorka: 4 kW
Skjástærð: BB Drægi: 5000 m
Mótun: CM Geislafjöldi: 5
Spenna: 100-240 VAC Straumtaka: 8.0 – 5.0 A
Ölduleiðrétting: FDF: Nei
FFS: Nei NavNet: Nei
AccuFish: (Split Beam) CHIRP: Nei
BDS: Nei DSP: Nei

PDF Skjöl

Bæklingur FCV-30 Bæklingur
Leiðarvísir FCV-30 Leiðarvísir